ललितपुर महालक्ष्मी नगरपालिका–७ चाँगाथलीमा निर्वाचन गस्तीमा खटिएका प्रहरी टोलीमाथि गएराति पौने ११ बजे केही व्यक्तिहरूले ढुंगामुढा गरेका छन्। प्रहरीका अनुसार, आक्रमणकारीहरूले प्रहरीमाथि हातपात गरेपछि टोलीले आत्मरक्षाका लागि १ राउन्ड हवाइ फायर प्रयोग गरी स्थितिलाई नियन्त्रणमा लिएको थियो।
घटनामा संलग्न चार जनालाई पक्राउ गरी जिल्ला अदालत ललितपुरबाट ८ दिनको म्याद थप गरी अनुसन्धान अघि बढाइएको छ। पक्राउ पर्नेहरूमा मकवानपुर गढी–२ का २९ वर्षीय विकास (बुद्ध) तामाङ, सल्यान दार्मा–३ का २० वर्षीय रमेश शाही, २० वर्षीय शंकर शाही र रुकुम सानोभेरी–२ का २२ वर्षीय राजु मगर रहेका छन्।
घटनामा घाइते भएका प्रहरी कर्मचारीको किष्ट अस्पतालमा उपचार भइरहेको छ। प्रहरीले घटनासम्बन्धी थप अनुसन्धान जारी राखेको जनाएको छ।
